झापा : विजयादशमी भन्नेबित्तिकै निधारमा रातो टीका, शिरमा पहेँलो जमरा र मान्यजनको आशीर्वादको दृश्य आँखाअघि आउँछ। तर झापामा एउटा समूहले भने यही पर्वमा कालो टीका लगाएर दशैँ बहिष्कार गरेको छ।
मंगोल नेसनल अर्गनाइजेसनका नेता तथा कार्यकर्ताले झापाका विभिन्न स्थानमा कार्यक्रम आयोजना गरी कालो टीका लगाउँदै दशैँ बहिष्कार गरेका हुन्। दशैँको परम्परागत मान्यताभन्दा फरक देखिएको उनीहरूको यो गतिविधिले पर्वप्रतिको दृष्टिकोण र सांस्कृतिक मान्यताबारे बहसको विषयसमेत प्रस्तुत गरेको छ।
मेचीनगर–२ भृकुटी चोकस्थित मंगोल रिसर्च सेन्टरको सभाहलमा सोमबार बिहान मंगोल नेसनल अर्गनाइजेसन मेचीनगरले आयोजना गरेको कार्यक्रममा सहभागीले कालो टीका लगाएर दशैँ बहिष्कार गरेका थिए। नगर अध्यक्ष किशोर धिमालको अध्यक्षता तथा सङ्गठनका केन्द्रीय अध्यक्ष बुद्धलाल मेचेको प्रमुख आतिथ्यमा भएको कार्यक्रममा केन्द्रीय मूलसचिव सन्तोष तामाङ, कोशी प्रान्तसभा सदस्य बानिरा मेचे, झापा जिल्ला अध्यक्ष सागर दर्जीलगायत करिब २० जना सहभागी थिए।
त्यस्तै, बुद्धशान्ति–१ पुलचोकस्थित सङ्गठनको गाउँसभा सभाहलमा पनि दशैँ बहिष्कार कार्यक्रम गरिएको थियो। गाउँसभा अध्यक्ष आइतबहादुर तामाङको अध्यक्षता तथा केन्द्रीय सभा सदस्य अकलबहादुर तामाङको प्रमुख आतिथ्यमा भएको कार्यक्रममा करिब २५ जना सहभागी थिए। उनीहरूले पनि कालो टीका लगाएर दशैँ बहिष्कार गरेका थिए।
नेपाली समाजमा विजयादशमीलाई असत्यमाथि सत्यको विजय, पारिवारिक पुनर्मिलन र आपसी सद्भावको पर्वका रूपमा लिइन्छ। यस दिन रातो टीका, जमरा र आशीर्वाद ग्रहण गर्ने परम्परा छ। तर सबै समुदाय र सङ्गठनले यस पर्वलाई एउटै दृष्टिकोणबाट हेर्दैनन्। मंगोल नेसनल अर्गनाइजेसनले दशैँ बहिष्कार गर्दै आएको छ। उनीहरूको यस कदमलाई सांस्कृतिक मान्यता र पहिचानप्रतिको फरक दृष्टिकोणका रूपमा बुझ्न सकिन्छ।
बहुसांस्कृतिक नेपाली समाजमा कुनै पर्व मनाउने वा नमनाउने विषय व्यक्तिको आस्था, विचार र छनोटसँग जोडिन्छ। परम्परागत रूपमा मनाइँदै आएको पर्वलाई निरन्तरता दिनेहरू र त्यसप्रति फरक धारणा राख्नेहरू दुवैको विचार बुझ्नु आवश्यक हुन्छ। यस्ता गतिविधिले सांस्कृतिक विविधता, पहिचान र परम्पराबारे संवादको आवश्यकता पनि औँल्याउँछन्।
