झापा : झापाको बिर्तामोडमा सञ्चालित किङ्सबरी होटल अन्तर्राष्ट्रिय होटल ब्रान्ड र्याडिसनको व्यवस्थापनमा सञ्चालन हुने भएको छ। होटललाई अन्तर्राष्ट्रियस्तरको आतिथ्य सेवासहित विस्तार गर्ने उद्देश्यले किङ्सबरी र र्याडिसन होटल समूहबीच सञ्चालन तथा व्यवस्थापनसम्बन्धी सम्झौता भएको हो।
सम्झौतासँगै पूर्वी नेपालको आतिथ्य तथा पर्यटन क्षेत्रमा अन्तर्राष्ट्रिय ब्रान्डको उपस्थिति विस्तार हुने अपेक्षा गरिएको छ। होटलको स्तरोन्नति र विस्तारका लागि थप एक अर्ब रुपैयाँ लगानी गर्ने योजना रहेको छ। परियोजना पूर्ण रूपमा सञ्चालनमा आएपछि ६५० भन्दा बढीलाई प्रत्यक्ष रोजगारी दिने लक्ष्य राखिएको होटलका कार्यकारी निर्देशक जानु घितालले जानकारी दिइन्।
सम्झौतामा र्याडिसन होटल समूहका विश्वव्यापी प्रमुख कार्यकारी अधिकृत फेडेरिको गोन्जालेज, दक्षिण एसियाका प्रबन्ध निर्देशक तथा प्रमुख सञ्चालन अधिकृत निखिल शर्मा र किङ्सबरी होटलका अध्यक्ष रवि शर्मा धितालको उपस्थितिमा हस्ताक्षर भएको हो। र्याडिसनको उच्च व्यवस्थापन तहको सहभागितामा भएको सम्झौताले नेपालको होटल तथा पर्यटन क्षेत्रमा नयाँ सम्भावना सिर्जना गर्ने अपेक्षा गरिएको छ।
हाल १५५ कोठासहित सञ्चालनमा रहेको किङ्सबरीलाई र्याडिसन ब्रान्डअनुसार रूपान्तरण गरी दुई चरणमा विस्तार गर्ने योजना छ। पहिलो चरण सन् २०२७ को अन्त्यसम्ममा सञ्चालनमा ल्याउने र दोस्रो चरण सन् २०२८ को मध्यसम्ममा सम्पन्न गर्ने लक्ष्य राखिएको छ।
किङ्सबरी होटलका अध्यक्ष धितालका अनुसार सन् २०२४ मा होटल अधिग्रहण गरेपछि त्यसलाई थप व्यवस्थित र अन्तर्राष्ट्रियस्तरको सेवा सुविधासहित विकास गर्ने योजना अघि बढाइएको हो। होटलको पूर्वाधार विस्तार, आवास सुविधा स्तरोन्नति तथा अतिथिलाई उपलब्ध गराइने सेवाको गुणस्तर सुधार गर्न थप लगानी गरिने उनले बताए।
र्याडिसनसँगको सहकार्यले होटललाई अन्तर्राष्ट्रिय आतिथ्य मापदण्डअनुसार सञ्चालन गर्न सहयोग पुग्ने अपेक्षा गरिएको छ। आधुनिक पूर्वाधार, गुणस्तरीय सेवा र अन्तर्राष्ट्रिय व्यवस्थापन प्रणालीमार्फत स्वदेशी तथा विदेशी पाहुनालाई आकर्षित गर्ने लक्ष्य होटलको छ।
होटल परिसरमा हाल क्यासिनोसमेत सञ्चालनमा छ। होटलको विस्तार र अन्तर्राष्ट्रिय ब्रान्डअनुसार व्यवस्थापन प्रक्रिया अघि बढेसँगै रोजगारीका अवसर बढ्ने तथा त्यसबाट स्थानीय बजार, व्यवसाय र पर्यटन गतिविधिमा सकारात्मक प्रभाव पर्ने अपेक्षा गरिएको छ।
पूर्वी नेपालको प्रमुख व्यापारिक केन्द्रका रूपमा विकास भइरहेको बिर्तामोडमा अन्तर्राष्ट्रिय होटल ब्रान्डको प्रवेशले व्यावसायिक भ्रमण, सभा–सम्मेलन तथा पर्यटकीय गतिविधिलाई प्रोत्साहन गर्न सक्ने देखिएको छ। झापासहित इलाम, ताप्लेजुङ, पाँचथर र कोशी प्रदेशका अन्य पर्यटकीय गन्तव्यमा आउने आन्तरिक तथा बाह्य पर्यटकलाई लक्षित गरी आतिथ्य सेवा विस्तार गर्ने सम्भावनासमेत यसले बढाउने अपेक्षा गरिएको छ।
होटल सञ्चालकका अनुसार यो परियोजना नेपालमा र्याडिसनको व्यवस्थापनअन्तर्गत सञ्चालन हुने पहिलो होटलका रूपमा अघि बढाइएको छ। अन्तर्राष्ट्रिय होटल व्यवस्थापनको अनुभव र मापदण्डलाई स्थानीय बजारसँग जोड्ने योजनाले नेपालको होटल उद्योगमा नयाँ अवसर सिर्जना गर्ने विश्वास लिइएको छ।
थप लगानी, अन्तर्राष्ट्रिय व्यवस्थापन र रोजगारी सिर्जनाको लक्ष्यसहित अघि बढेको यो परियोजना बिर्तामोडको व्यावसायिक पहिचान विस्तार गर्ने महत्त्वपूर्ण योजनाका रूपमा हेरिएको छ। यद्यपि, घोषित लगानी र रोजगारीको लक्ष्य कार्यान्वयनको चरणमा कसरी अघि बढ्छ भन्ने कुरा होटल विस्तारको प्रगति र सञ्चालन योजनाले निर्धारण गर्नेछ।
