झापा : झापामा आँखाको उपचार गराउन बिरामी लिएर नेपाल आउँदै गरेको एम्बुलेन्सबाट गोली बरामद भएपछि एक भारतीय युवक पक्राउ परेका छन्। भारतको पश्चिम बंगालस्थित नेपाल–भारत सीमा नाका पानीट्यांकीमा सशस्त्र सीमा बल (एसएसबी) ले जाँच गर्ने क्रममा ९ एमएमको प्रयोग नभएको एक थान गोली बरामद गरेको हो।
गोलीसहित पक्राउ पर्नेमा भारतको मणिपुर निवासी २० वर्षीय युवक रहेका छन्। भारतीय प्रहरीका अनुसार उनी आँखाको उपचारका लागि झापा आउन लागेको एम्बुलेन्समा सवार थिए।
नेपाल प्रवेश गर्ने तयारीमा रहेको एम्बुलेन्सलाई पानीट्यांकी नाकामा जाँच गर्ने क्रममा गोली फेला परेको जनाइएको छ। त्यसपछि गोलीसहित युवकलाई नियन्त्रणमा लिएर भारतीय प्रहरीले पक्राउ गरेको हो।
सीमा क्षेत्रमा नियमित जाँचका क्रममा गोली बरामद भएपछि घटनाबारे थप अनुसन्धान अघि बढाइएको छ। पक्राउ परेका युवकले गोली किन र कुन प्रयोजनका लागि बोकेका थिए भन्ने विषय भने खुलेको छैन।
नेपाल–भारत सीमा क्षेत्रमा आवतजावत गर्ने सवारीसाधन तथा यात्रुको जाँचका क्रममा गोली बरामद भएको यो घटनाले सीमावर्ती नाकामा सुरक्षा निगरानीको विषयलाई पुनः चर्चामा ल्याएको छ। घटनाबारे भारतीय सुरक्षा निकाय र प्रहरीले थप अनुसन्धान गरिरहेका छन्।
